༄༅། །ཟླ་འོད་འོག་གི་དྲན་གདུང་།

ཉ་གང་ཟླ་བའི་འོག་ལ། །

གཅིག་པུར་འཆམ་འཆམ་ཕྱིན་པས། །

མིག་ཟུར་བལྟ་ཕྱོགས་ཤིག་གིས། །

ཡིད་འཕྲོག་བུ་མོ་འཛུམ་བྱུང་། །

ཁྲ་ཆུང་མིག་ཟུང་གཉིས་ཀྱིས། །

ལས་འཕྲོའི་མདུད་པ་ཐེབས་སོང་། །

བུ་མོའི་ཁ་འབྲས་མཚར་བས། །

ཡིད་ཀྱི་དུང་སེམས་འཕྲོག་སོང་། །

མ་འཕྲད་མ་མཐོང་ཆོག་ག །

སེམས་པ་ལྷོད་ལ་མི་སྡོད། །

བུ་མོ་ལང་ཚོ་བཀྲ་བས། །

བདག་སེམས་རང་དབང་བྲལ་སོང་། །

སྙིང་ཁོང་རུས་པའི་གསེང་དུ། །

ཁྱེད་ཀྱི་གཟུགས་བརྙན་བརྐོས་ཡོད། །

བག་ཆགས་རྨི་ལམ་ནང་ནས།།

མཇལ་འཛོམས་བྱུང་ན་བསམ་བྱུང་། །

ཉིན་མོའི་རྣམ་ཤེས་བོར་ས། །

བདག་སེམས་སོང་བའི་བུ་མོ། །

མཚན་མོའི་གཉིད་ཐེབས་གཅོག་མཁན། །

སྙིང་སྡུག་ཡིད་འཕྲོག་ལྷ་མོ། །

ངང་སེར་ཆ་འགྲིག་ལྟ་བུའི། །

བརྩེ་བ་བདག་ལ་མེད་རུང་། །

སེམས་པས་སེམས་པ་དྲོད་པའི། །

སྐྱིད་སྡུག་ངང་གིས་འགྲིམ་ཆོག །

ནམ་ཟླའི་འཁོར་རིམ་དཀྱིལ་ནས། །

ཉ་གང་ཟླ་བ་སྒུག་ཡོད། །

བཤད་འཕྲོར་ལུས་པའི་སྙིང་གཏམ།

སྙིང་གི་དབུས་སུ་གསལ་ཡོད། །

སྙིང་སྡུག་དྲན་པའི་སྐྱོ་གླུ། །

ཨ་སྔོན་ཕྱོགས་ལ་ལེན་པས། །

གནམ་ནས་བབས་པའི་ཆར་པ། །

དྲན་པའི་མིག་ཆུ་འདྲ་བྱུང་། །

དགུང་གི་གནམ་མཐའི་མཚམས་ནས། །

འོད་དཀར་ཟླ་བ་འཆར་དུས། །

སྙིང་སྡུག་དྲན་པའི་གདུང་བ། །

གནམ་སས་མ་གཏོགས་མི་ཤེས། །

ཁྱོད་ནི་གྲོང་ཁྱེར་བུ་མོ། །

ང་ནི་འབྲོག་པའི་བུ་ཕྲུག །

ཕན་ཚུན་བརྩེ་བ་ཡོད་ཀྱང་། །

ལས་དབང་ཡོད་མེད་མི་ཤེས། །

ཟླ་བ་ནུབ་ལ་བཞུད་སོང་། །

ཆུ་མོ་ཤར་ལ་རྒྱུགས་སོང་། །

སེམས་པ་གདུང་བའི་རྨ་ཁ། །

བཅོས་ཐབས་ཨེ་ཡོད་བསམ་བྱུང་།

སྙིང་སྡུག་བྱ་རྡོ་ལམ་འཕྲད། །

རི་གཟར་རྦབ་རྡོའི་བརྩེ་བ། །

ཚེ་འདིར་ལས་ཀྱི་བསྐོས་ཐང་། །

ཕྱི་མ་མེད་པའི་སྨོན་ལམ། །

ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།

ཟུར་ཁྲིད་དགེ་རྒན། ཕུར་བུ་ལྷན་འཛོམས།