༄༅། །བུ་མོ་ང་ཡི་ཕ་ཡུལ།

ཕ་ཡུལ་ཞེས་པའི་ཡིག་འབྲུ་འདི་གཉིས་རྣ་ལམ་དུ་ཐོས་ཚེ། དེ་ནི་སྙན་འཇེབས་ལྡན་པའི་མིང་ཚིག་ཅིག་ཡིན་ལ། རང་གིས་དེ་ཉིད་ངོམ་སོ་བྱེད་པ་ནི་གཟི་བརྗིད་ཆེ་ཤོས་ཤིག་ཏུ་བརྩི་བཞིན་ཡོད། མི་རྣམས་རང་རང་ན་སོ་མཐོན་པོར་སླེབས་པ་དང་རང་ཉིད་ཆེས་སླེབས་ན་བསམ་པའི་ཡུལ་དེ་ནི་ཕ་ཡུལ་ཁོ་ན་རེད། དེ་ནི་རང་ཉིད་ཆུང་དུས་འཚར་ལོངས་འབྱུང་སའི་གནས་ཡིན་པས། ཀུན་གྱིས་དེ་ལ་ཞེ་འཕྲེང་འཕྲེང་དང་ཡིད་དུང་དུང་བྱེད་ཀྱི་ཡོད།

ཕ་ཡུལ་ནི་རང་གི་ཕ་མེས་ཡང་མེས་འཚོ་གནས་བྱ་ཡུལ་དང་། རང་ཉིད་ཆུང་བྱིས་དུས་ནས་འཚར་ལོངས་འབྱུང་སའི་གནས་ཀྱང་ཡིན། ངའི་ངོས་ནས་བཤད་ན། ཕ་ཡུལ་ནི་རང་ཉིད་ཆེས་དགའ་ས་དང་། ཡང་ནས་བསྐྱར་དུ་ཡིད་ལ་དྲན་པའི་ཡུལ་དེར་ངོས་འཛིན་གྱི་ཡོད། རང་ཉིད་ཆུང་ངུའི་དུས་ཀྱི་དུས་ཚོད་མང་ཆེ་བ་ཕ་ཡུལ་ལ་བསྐྱལ་ཡོད། ངའི་ཕ་ཡུལ་ལ་མཚོན་ན་ལོ་རྒྱུས་དང་གཏམ་རྒྱུད་མང་པོ་ཞིག་ཤོད་རྒྱུ་ཡོད་ལ། མི་སྣ་གྲགས་ཅན་ཡང་དུ་མ་འབྱུང་མྱོང་།

ཕ་ཡུལ་གྱི་དགོན་པ་གཙོ་བོ་ནི་ཝ་ཐང་དགོན་པ་ཡིན་ཞིང་། དགོན་པ་དེ་ཕྱག་མ་བཏབ་ཙམ་གྱི་གོང་ལ་གང་ནས་ཡོང་བ་མི་ཤེས་པའི་འབྲོང་ཞིག་དེར་སླེབས་ནས་ཉལ་བསྡད་པས། རྟགས་དང་རྟེན་འབྲེལ་བཟང་བར་བརྩིས་ནས་དགོན་པ་དེ་དེར་བཞེངས་པར་གྲགས། དགོན་པ་དེ་བཞེངས་ནས་ལོ་ངོ་མང་པོ་སོང་ཟིན་མོད། དེའི་གཟི་བྱིན་དང་མཛེས་སྡུག རྫིག་ཉམས་བཅས་ནི་སྔར་མུས་བཞིན་གནས་ཡོད།

གྲགས་ཅན་མི་སྣའི་ངོས་ནས་བཤད་ན། དཔོན་པོ་རག་སྡིས་ནི་ང་ཚོའི་ཕ་ཡུལ་ནས་ཡིན་ཞིང་། ཁོང་ཆུང་ངུའི་དུས་སུ་འཚོ་བ་ངན་ངོན་ཙམ་ལས་སྐྱེལ་རྒྱུ་མེད་ཅིང་། སྟག་དྲུག་དཔོན་གྱི་ལག་འོག་ཏུ་དཀའ་ངལ་དུ་མ་བརྒྱུད་པ་དང་། མཐར་བོད་ལ་བཅིངས་འགྲོལ་གཏོང་སྐབས་སློབ་གྲྭར་འགྲོ་རྒྱུའི་བསྐལ་བ་ཐོབ་ནས་རིམ་པས་རང་གི་དཀའ་སྤྱད་སྙིང་རུས་བརྒྱུད་མི་དམངས་ཀྱི་གུས་བཀུར་ཐོབ་པའི་དཔོན་པོ་ཞིག་ཏུ་གྱུར་པ་རེད། ད་དུང་ཧ་ཧྥུ་སློབ་ཆེན་ནས་འབུམ་རམས་པའི་མཚན་རྟགས་བླངས་པའི་དབྱངས་དགའ་ཡང་ང་ཚོའི་ཕ་ཡུལ་ནས་ཡིན། སློབ་ཚན་སྐབས་རྒན་ལགས་ཀྱིས་དབྱངས་དགའ་ནི་བོད་ཀྱི་གསོ་རིག་རྒྱུད་འཛིན་པ་ཁྲོ་རུ་ཚེ་རྣམ་མཆོག་གི་སློབ་མ་རེད་ཅེས་གསུངས་མྱོང་ཡོད། ད་དུང་གཞོན་ནུའི་གྲས་སུ་ལུས་རྩལ་པ་གྲགས་ཅན་ཚེ་རིང་དགྲ་འདུལ་ཡོད། ཁོང་ཚོ་ནི་ཆུང་དུས་ནས་ངས་དགའ་པོ་བྱེད་པ་དང་མིག་དཔེ་ཞུ་ཡུལ་གྱི་མི་སྣ་རྐྱང་ཡིན། ཁོང་ཚོ་བརྒྱུད་ང་ལ་སློབ་སྦྱོང་ཐད་སྔར་བས་འབད་བརྩོན་ཧུར་ཐག་བྱེད་པའི་སེམས་ཤུགས་འཕེལ་བྱུང་།

ངའི་ཕ་ཡུལ་གྱི་ཡུལ་ལྗོངས་མཛེས་ཤིང་ལྟ་ན་སྡུག་པ་དང་། དབྱར་ཁའི་དུས་སུ་ནོར་ཡོད་པའི་དུད་ཚང་ཁག་རྩྭ་ཐང་དུ་ནོར་བསྐོར་ནས་ནོར་བཞོ་བ་དང་། གནས་སྡོད་བྱ་ཡུལ་ནི་ནོར་གྱི་རྩིད་པས་ལས་རེ་ལྡེའི་སྦྲ་གུར་ཡིན། གུར་ནང་དུ་ཆུར་བ་འཐག་པ་དང་བཏགས་ཟིན་པའི་ཆུར་བ་རྣམས་སྦྲའི་མཐའ་སྐོར་གྱི་ཐང་ལ་བརྡལ་ནས་སྐམ་གྱི་ཡོད། བྱིས་པ་ཆུང་ཆུང་ཚོའི་ལས་འགན་ནི་ཆུར་བ་རྐུ་མཁན་གྱི་བྱིའུ་དག་དཀྲོགས་རྒྱུ་དེ་ཡིན། ཕ་ཡུལ་གྱི་རི་བོའི་ངོགས་སུ་སེར་ཤ་དང་ཤ་མོ་སོགས་རང་བྱུང་ཁམས་ཀྱི་གནང་སྦྱིན་མགོ་བོའི་སྐྲ་ལས་མང་བ་ལོངས་སུ་སྤྱོད་རྒྱུ་ཡོད་པ་ནི་དབྱར་དུས་ཀྱི་ཕྱག་རྟགས་ཡག་ཤོས་དེ་ཡིན། མ་ཟད་ཕྱུགས་རིགས་འཕེལ་ཁ་དར་ཞིང་། བེའུའི་གྲངས་འབོར་སྔར་ལས་མང་། སོས་ཡག་པའི་འབྲི་མོ་ལ་ལར་བེའུ་མཚེ་མ་སྐྱེས་པ་ཡང་ཡོད། སྔོ་ཞིང་ལྗང་པའི་རི་བོ་དང་རྩྭ་ཐང་ནི་མི་ཞིག་གིས་བྲིས་པའི་རི་མོ་ལྟར་མཚར་སྡུག་བཀྲ་ལ། སྐྱིད་སྐྱིད་དང་རྟེན་འབྲེལ་གྱི་མཛད་སྒོ་མང་ཆེ་བ་ནམ་དུས་འདིར་སྤེལ་གྱི་ཡོད།

སྟོན་ཁ་སླེབས་ཚེ་རི་བོ་ཚང་མ་གསེར་གོས་གཡོགས་པ་ལྟར་སེར་ལམ་ལམ་དང་། ཞིང་པའི་ས་ཆར་དཔྱིད་ཀར་བཏབ་པའི་ལོ་ཏོག་གི་འབྲས་བུ་ལེན་སྐབས། ང་ཚོ་འབྲོག་པ་ནི་དགུན་དུས་སྒོ་ཕྱུགས་གསོ་བྱེད་ཀྱི་གཟན་རྩྭ་ཕྲན་བུ་བཏབ་པ་དེ་གཅོད་ཀྱི་ཡོད། ངའི་ཨ་ཁུ་ཞིག་གིས་ང་ལ་རྩེད་མཚར་དང་སྦྲགས“ང་ཚོས་དཔྱིད་ཀར་བཏབ་པའི་འབྲས་བུ་སྟོན་ཁ་ལ་སྨིན་པ་འདི་རེད། ཁྱོད་ཚོའི་དཀའ་བ་སྤྱད་པའི་ཡོན་ཏན་གྱི་འབྲས་བུ་གང་དུ་ཡོད”ཅེས་འདྲི་མྱོང་། ངོ་མ་དེ་ལས་ང་ཚོས་རྒྱུ་འབྲས་ཟེར་བ་གང་འདྲ་ཡིན་པ་ཧ་གསལ་པོ་གོ །

དགུན་ཁ་སླེབས་སྐབས་རི་བོ་ཚང་མས་གསེར་མདོག་གི་གྱོན་ཆས་ཕུད་དེ་སྐུ་ལ་དངུལ་མདོག་གི་གོས་དཀར་བཀླུབས་པ་དང་འདྲ། ལྷུན་བརྗིད་ཀྱི་གངས་རི་དག་ནི་སྔར་བས་རྔམ་ཟིལ་ཆེ། བོད་ཀྱི་ལོ་གསར་ནི་ཏག་ཏག་ནམ་དུས་འདི་ལ་གཏོང་བས་རེ་སྒུག་བྱ་ཡུལ་གཙོ་བོ་ཞིག་ཡིན། མ་གཞི་ཕ་ཡུལ་ལ་གྲང་ངད་ཇི་ཙམ་ཆེ་ཡང་ཚ་སོབ་སོབ་ཀྱི་མེ་ཞིག་བཏང་ནས་ཁྱིམ་མི་རྣམས་ལྷན་དུ་སྡོད་རྒྱུ་ཡོད་པས་དགའ་བ་དཔག་མེད་སྐྱེ་ལ། སྐབས་རེ་རྒྱ་ཁོག་ཚ་པོ་རེ་རོ་འཛིན་གྱི་ལོངས་སུ་སྤྱོད་ཆོག་པས་འདི་ལས་དགའ་བ་ཅི་ཞིག་དགོས། ཕ་ཡུལ་གྱི་དུས་ཚིགས་བཞི་ཤིན་ཏུ་སྐྱིད། དུས་ཚིགས་སོ་སོར་རང་རང་གི་དགེ་མཚན་རེ་ལྡན་པས་ལེགས་ཉེས་ཀྱི་དབྱེ་བ་འབྱེད་དུ་མེད།

ང་རང་ཆུང་དུས་ནས་ཕ་ཡུལ་ལ་སྡོད་རྒྱུར་དགའ་མོད། སློབ་གྲྭ་འགྲིམ་དགོས་པའི་དབང་གིས་ཕ་ཡུལ་དུ་ལོག་རྒྱུའི་དུས་ཚོད་ཇེ་ཉུང་ནས་ཇེ་ཉུང་རེད། དེ་རིང་ངས་དྲིན་གཟོའི་ཚུལ་དུ་ཕ་ཡུལ་དང་འབྲེལ་བའི་རྩོམ་ཡིག་འདི་བྲིས་པ་ཡིན། ང་རང་ཉིད་ཀྱི་ཕ་ཡུལ་ལ་དགའ་ཞིང་དེ་བས་མཐུན་སྒྲིལ་ཆེ་བའི་ཕ་ཡུལ་གྱི་མི་དམངས་ལ་དགའ། ང་ས་ཆ་གང་དུ་སོང་ཡང་རང་ཉིད་ཀྱི་ཕ་ཡུལ་ཞེ་བསམ་པའི་གཏིང་ནས་བརྗེད་མི་སྲིད། ང་རང་བདེ་སྐྱིད་དང་འཕོ་འགྱུར་ཁྲོད་ཀྱི་ཕ་ཡུལ་ལ་དགའ་ཞིང་། ཕ་ཡུལ་མུ་མཐུད་འཕེལ་རྒྱས་གཏོང་མཁན་གྱི་མི་སྣ་ཞིག་བྱེད་པར་དེ་བས་ཀྱང་དགའ། བྱས་ཙང་ངས་བརྩོན་འགྲུས་ཆེན་པོས་སློབ་སྦྱོང་བྱས་ཏེ། ཕ་ཡུལ་ལ་ཕན་པ་སྐྲུན་མཁན་གྱི་མི་སྣ་ཞིག་ཆགས་ཐུབ་པ་བྱེད་ངེས་ཡིན། །

འབྲི་རུ་རྫོང་སློབ་འབྲིང་དང་པོའི་ལོ་རིམ༨（༦）

ཟུར་ཁྲིད་དགེ་རྒན། དགའ་བཟང་།