放大
缩小
默认སྟེས་དབང་ལས་སྨོན་ཚོགས་ཀྱིས་མ་རུ་སྦྲུམ། །
ཟླ་དགུ་ཞག་བཅུ་འཇལ་ནས་འཇིག་རྟེན་བསུས། །
པགས་རྩག་ལུས་ལ་ཤོམས་པའི་སྐལ་བཟང་དུས། །
དལ་འབྱོར་མི་ལུས་བསྩལ་བའི་ཡུམ་ཆེན་དྲན། །
ཁུ་སིམ་འཇིག་རྟེན་དཀྲོགས་པའི་རིག་གནས་སྦྱོང་། །
ཆབ་རྡེའུ་ཆུ་མིག་སྒྲིལ་བའི་རྩེད་འཇོའི་དཔལ། །
སྐད་ཡིག་ངག་ལ་འཁྱིལ་བའི་རྟིང་མའི་དབྱངས། །
བྱམས་ལྡན་ཕ་ལོའི་གདམས་པ་ཅིས་མ་ཡིན། །
སྦྲང་དཀར་རྩམ་པའི་བྲོ་བ་རབ་མྱོང་ཞིང་། །
ཞིམ་མངར་འོ་ཇ་མངར་མོའི་བཅུད་ཀྱིས་གསོས། །
བཅུད་ལྡན་འབྲི་མར་སེར་པོའི་སྣུམ་ཟུངས་དག །
གངས་དཀར་ཨ་མའི་ཕྱག་ཟས་དྲོན་མོ་ལགས། །
རྒྱ་ལྕང་ལྕུག་ཕྲན་ཅང་ཤེས་བང་ཁའི་འགྲོས། །
རྡོ་ཆས་ཆག་རྩིག་མི་ལའི་སྲས་མཁར་འཁྲུལ། །
ལྕི་ལོག་ཨོང་བ་གཡང་ཕྱུགས་ནོར་དུ་བསུས། །
རྨད་བྱུང་བྱིས་དུས་ཕ་ལོའི་གཞིས་ལ་ཆགས། །
ཐོ་རེངས་སྐར་ཆེན་འཁོར་བའི་འབོད་སྐུལ་ཡིན། །
མཛོ་བཏགས་རྒྱུ་སྐར་ངལ་གསོའི་གདན་དུ་འཆིངས། །
དུས་ཚོད་ཉེར་བཞིར་ལུས་སེམས་བུ་ལ་འབད། །
རླབས་ཆེན་ཡབ་ཡུམ་ཟུང་གི་རྔུལ་རིན་ཙམ། །
ཤེས་མེད་བུ་ངས་མི་ཡུལ་ས་མཐའ་ནས། །
བྱམས་ལྡན་ཉི་ཟླ་ཟུང་གི་དྲིན་འཇལ་དབེན། །
འོན་ཏེ་ཤེས་བརྩོན་ངད་ཀྱིས་རབ་མྱོས་ནས། །
གྲོགས་བཟང་ཞ་སྨྱུག་རྩེ་ནས་ཁྱེད་རྟག་རྨད། །
放大
缩小
默认
