༄༅། །ཀ་ཕྲེང་ཆང་གི་ཉེས་པ།

ཀ་བར་རྡུང་ཁ་རྒྱག་པ་ཆང་གིས་བཟོས། །

ཁ་ཆག་སྣ་རལ་ཡོང་བ་ཆང་གིས་བཟོས། །

ག་བྱེད་འདི་བྱེད་མེད་པ་ཆང་གིས་བཟོས། །

ང་རྒྱལ་བློ་མིག་ལོང་བ་ཆང་གིས་བཟོས། །

ཅ་ཅོ་གང་སར་སྨྲ་བ་ཆང་གིས་བཟོས། །

ཆ་བཞག་ཉ་བཞག་མེད་པ་ཆང་གིས་བཟོས། །

ཇ་ཆང་ལོངས་སྤྱོད་སྟོངས་པ་ཆང་གིས་བཟོས། །

ཉ་ཉོག་རྙོག་དྲ་མང་བ་ཆང་གིས་བཟོས། །

ཏ་རེན་དཔོན་གནས་ཤོར་བ་ཆང་གིས་བཟོས། །

ཐ་མལ་ནད་ཀྱིས་མནར་བ་ཆང་གིས་བཟོས། །

ད་ལོའི་འཆར་གཞི་མེད་པ་ཆང་གིས་བཟོས། །

ན་ནིང་བུ་ལོན་ཆད་པ་ཆང་གིས་བཟོས། །

པ་ར་ཤོ་རྒྱན་རྩེད་པ་ཆང་གིས་བཟོས། །

ཕ་བུའི་དམ་ཚིག་དོར་བ་ཆང་གིས་བཟོས། །

བ་གླང་དངུལ་ལ་བརྗེ་བ་ཆང་གིས་བཟོས། །

མ་སྨད་དབྱུག་པས་རྡུང་བ་ཆང་གིས་བཟོས། །

ཙ་ཆེན་རྒྱུ་ནོར་བརྐུ་བ་ཆང་གིས་བཟོས། །

ཚང་མས་འཕྱ་དམོད་བྱེད་པ་ཆང་གིས་བཟོས། །

ཛ་ཛོར་སྐྱུག་པས་འཚོས་པ་ཆང་གིས་བཟོས། །

ཝ་མོའི་གཡོ་སྒྱུས་བསླུ་བ་ཆང་གིས་བཟོས། །

ཞྭ་གོས་ལུས་ནས་ཕུད་པ་ཆང་གིས་བཟོས། །

ཟ་རྒྱུ་འཐུང་རྒྱུ་མེད་པ་ཆང་གིས་བཟོས། །

འ་འུར་དོན་མེད་གླེང་བ་ཆང་གིས་བཟོས། །

ཡ་ཡུག་གཡང་ལ་མཆོངས་པ་ཆང་གིས་བཟོས། །

ར་རོ་གཞན་གྱིས་འཕྱ་དགོས་ཆང་གིས་བཟོས། །

ལས་དོན་སྙིང་ནས་བརྗེད་པ་ཆང་གིས་བཟོས། །

ཤ་ཚའི་གཏམ་ལ་བསུན་པ་ཆང་གིས་བཟོས། །

ས་ཆ་བདག་མེད་ལུས་པ་ཆང་གིས་བཟོས། །

ཧ་ཅང་རགས་པའི་ཆང་གི་ཉེས་དམིགས་དག །

ཨ་ཙི་ཁྱེད་ཚོའི་རྣ་ལ་འཇགས་སོང་ངམ། །

ཧ་ལམ་མི་དགེ་ཐམས་ཅད་ཆང་གི་སྐྱོན། །

ཨ་རོགས་རིག་པ་ཡོད་ན་ཆང་འདི་སྤོངས། །

ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།

ཟུར་ཁྲིད་དགེ་རྒན། བོན་བསྟན་འཛིན།