放大
缩小
默认སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཀྲུང་ཧྭ་མི་རིགས་ཀྱི་ཐུན་མོང་གི་བསམ་པའི་ཁྱིམ་གཞིས་བསྐྲུན་པར་ངེས་པར་དུ་ཀྲུང་ཧྭའི་རིག་གནས་ཀྱི་མོས་སེམས་ཆེ་རུ་གཏོང་དགོས”ཞེས་གསུངས་ཡོད། རྣམ་བཤད་གལ་ཆེན་འདི་ལས་ཀྲུང་ཧྭ་མི་རིགས་ཀྱི་མཐུན་སྒྲིལ་ཡར་ཐོན་གྱི་བསམ་པའི་སྟོབས་ཤུགས་ཟབ་མོ་མངོན་པ་མ་ཟད། དུས་རབས་གསར་པར་ཀྲུང་ཧྭ་མི་རིགས་ཀྱི་ཐུན་མོང་གི་བསམ་པའི་ཁྱིམ་གཞིས་སྐྲུན་པའི་ལྟེ་བའི་ལས་འགན་ཡང་ཁ་གསལ་བཏོན་ཡོད། འདི་ནི་ཀྲུང་ཧྭའི་རིག་གནས་ཀྱི་ལོ་རྒྱུས་རིན་ཐང་ལ་གདེང་འཇོག་བྱས་པ་ཞིག་ཡིན་ལ། ཀྲུང་ཧྭ་མི་རིགས་མཐུན་སྒྲིལ་ཆེན་པོ་མངོན་འགྱུར་ཡོང་བའི་ཐབས་ལམ་གལ་ཆེན་ཞིག་ཀྱང་རེད།
ཀྲུང་ཧྭའི་རིག་གནས་ནི་ཀྲུང་ཧྭ་མི་རིགས་ཀྱི་རྩ་བ་དང་བླ་སྲོག་ཡིན་ཞིང་། མི་རིགས་56གིས་ཐུན་མོང་ཐོག་གསར་གཏོད་དང་མཉམ་སྤྱོད་བྱེད་པའི་རིག་གནས་ཀྱི་མཆོག་ནོར་ཞིག་ཡིན། ཀྲུང་ཧྭའི་རིག་གནས་ཀྱི་མོས་སེམས་ནི་ཀྲུང་ཧྭ་མི་རིགས་ཀྱི་ཐུན་མོང་ལོ་རྒྱུས་ལ་བཅངས་པའི་མོས་སེམས་ཤིག་ཡིན་ལ། ཐུན་མོང་གི་རིན་ཐང་ལྟ་བ་དང་རིག་གནས་བརྩེ་སེམས་ལ་བཅངས་པའི་མོས་སེམས་ཤིག་ཀྱང་ཡིན། ཀྲུང་ཧྭ་མི་རིགས་ཀྱི་ཐུན་མོང་གི་བསམ་པའི་ཁྱིམ་གཞིས་བསྐྲུན་པར་ངེས་པར་དུ་ཀྲུང་ཧྭའི་རིག་གནས་ཀྱི་མོས་སེམས་རྨང་གཞིར་བྱེད་དགོས། ཀྲུང་ཧྭ་མི་རིགས་ཀྱི་ཐུན་མོང་གི་བསམ་པའི་ཁྱིམ་གཞིས་ནི་ཀྲུང་ཧྭ་མི་རིགས་ཁག་གི་མི་དམངས་ཀྱི་ཐུན་མོང་གི་རིག་གནས་དྲན་འཆར་དང་། ལོ་རྒྱུས་ཀྱི་བརྩེ་སེམས། རིན་ཐང་གི་དོན་གཉེར་བཅས་ཡིན། བསམ་པའི་ཁྱིམ་གཞིས་དེ་ནི་རྒྱལ་ཁབ་གཅིག་གྱུར་གྱི་ཀ་རྟེན་གལ་ཆེན་ཞིག་ཡིན་པ་མ་ཟད། མི་རིགས་མཐུན་སྒྲིལ་དང་། སྤྱི་ཚོགས་བརྟན་ལྷིང་། རིག་གནས་གདེང་ཚོད་བཅས་ཀྱི་རྨང་གཞི་གལ་ཆེན་ཞིག་ཀྱང་ཡིན། ཀྲུང་ཧྭའི་རིག་གནས་ནི་ཀྲུང་ཧྭ་མི་རིགས་ཐུན་མོང་གི་བསམ་པའི་སྦྲེལ་ཐག་ཅིག་ཡིན། མི་རིགས་ཁག་དབར་གོམས་སྲོལ་སོགས་ཐད་ཁྱད་པར་ཡོད་མོད། འོན་ཀྱང་ཚང་མས་ཀྲུང་ཧྭའི་རིག་གནས་ལྟེ་བར་བྱས་ཏེ་ཀྲུང་ཧྭའི་ཤེས་དཔལ་ལ་བཅངས་པའི་མོས་སེམས་དང་དགའ་ཞེན་མཉམ་དུ་རྒྱུན་འཛིན་བྱེད་ཀྱི་ཡོད།
མི་ཚང་མས་ཀྲུང་ཧྭའི་རིག་གནས་ཀྱི་རིན་ཐང་གི་ལྟ་བ་དང་། ལོ་རྒྱུས་ཀྱི་ལྟ་བ། མི་རིགས་ཀྱི་ལྟ་བ་བཅས་ལ་གོ་བ་གཏིང་ཟབ་ལོན་ཚེ། གཞི་ནས་ཀྲུང་ཧྭ་མི་རིགས་ཀྱི་གཏོགས་སེམས་གྲུབ་ཐུབ། མོས་སེམས་དེ་རིགས་ཀྱིས་སྒེར་གྱིས་སྣ་མང་རིག་གནས་ཀྱི་འགལ་ཟླའི་མདུན་དུ་རིག་གནས་ཀྱི་གདེང་ཚོད་རྒྱུན་འཇགས་ཐུབ་པར་རོགས་རམ་ཐུབ་སྟེ་ཐུན་མོང་ཐོག་རིག་གནས་ཀྱི་རྨང་གཞི་སྲུང་སྐྱོང་བྱེད་ཐུབ། ཀྲུང་ཧྭའི་རིག་གནས་ཀྱི་མོས་སེམས་ཆེ་རུ་གཏོང་བར་བསམ་བློའི་འཁྱེར་སོ་ཙམ་མིན་པར་མི་རིགས་ས་ཁུལ་གྱི་འཕེལ་རྒྱས་དངོས་དང་ཟུང་འབྲེལ་དམ་ཟབ་བྱེད་དགོས། བྱེད་ཐབས་སྣ་ཚོགས་སྤྱད་དེ་ཀྲུང་ཧྭའི་རིག་གནས་མི་རིགས་ཁག་གི་མི་དམངས་ཀྱི་འཚོ་བའི་ཁྲོད་ཁྱབ་གདལ་བཏང་སྟེ་ཁོང་ཚོའི་བརྩེ་སེམས་དང་བསམ་བློའི་ཐུན་མོང་གི་འདེགས་སྐྱོར་དུ་འགྱུར་བར་བྱེད་དགོས། རིག་གནས་ཀྱི་མོས་སེམས་དེ་སློབ་གསོ་ནས་དམ་འཛིན་བྱེད་དགོས་པ་དང་ལྷག་པར་དུ་གཞོན་ནུ་ལོ་ཆུང་གི་ཚོགས་སྤྱིའི་ཁྲོད་ཀྲུང་ཧྭའི་རིག་གནས་བརྒྱུད་བསྒྲགས་བྱེད་པ་དང་འབྲེལ་མོས་སེམས་ཆེ་རུ་གཏོང་དགོས། མི་རིགས་ཁག་གི་ཕུལ་བྱུང་སྲོལ་རྒྱུན་རིག་གནས་ནི་ཀྲུང་ཧྭའི་རིག་གནས་ཀྱི་གྲུབ་ཆ་གལ་ཆེན་ཞིག་རེད། བསམ་པའི་ཁྱིམ་གཞིས་བསྐྲུན་པར་རིག་གནས་དེ་དག་སྲུང་སྐྱོང་དང་རྒྱུན་འཛིན་ལ་སྣང་ཆེན་བྱས་ཏེ་ཀྲུང་ཧྭའི་རིག་གནས་ཁྲོད་གསོན་ཤུགས་གསར་པ་འཕེལ་བར་བྱེད་དགོས། ཀྲུང་ཧྭའི་རིག་གནས་ཀྱི་མོས་སེམས་སྤེལ་རེས་ཁྲོད་ཟབ་ཏུ་གཏོང་བ་དང་རིག་གནས་དུས་ཆེན་དང་རིག་རྩལ་བྱེད་སྒོ་སྤེལ་བ་སོགས་ཀྱི་བྱེད་ཐབས་སྤྱད་དེ་ཕན་ཚུན་སྤེལ་རེས་ཁྲོད་མི་རིགས་ཁག་གིས་ཀྲུང་ཧྭའི་རིག་གནས་ལ་འཛིན་པའི་བསམ་ཤེས་དང་མོས་སེམས་ཆེ་རུ་གཏོང་དགོས།
ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པར་ཀྲུང་ཧྭའི་བུ་ཕྲུག་ཡོངས་ཀྱིས་ཐུན་མོང་འབད་འཐབ་བྱེད་དགོས་པ་དང་རིག་གནས་ཀྱི་མོས་སེམས་ནི་མི་རིགས་ཡོངས་ཀྱི་སྟོབས་ཤུགས་གཅིག་ཏུ་སྒྲིལ་བའི་ཆ་རྐྱེན་གལ་ཆེན་ཞིག་རེད། ཀྲུང་ཧྭའི་བུ་ཕྲུག་ཚོས་ཏང་གི་འགོ་ཁྲིད་འོག་ཀྲུང་ཧྭའི་རིག་གནས་རྒྱུན་འཛིན་དང་དར་སྤེལ་བཏང་སྟེ་མི་རིགས་མཐུན་སྒྲིལ་དང་སྤྱི་ཚོགས་འཆམ་མཐུན་གྱི་བསམ་པའི་ཁྱིམ་གཞིས་མཉམ་དུ་བསྐྲུན་ནས་ཀྲུང་གོའི་ལུགས་ཀྱི་དེང་རབས་ཅན་མངོན་འགྱུར་བྱ་ཆེད་བློ་གྲོས་དང་སྟོབས་ཤུགས་སྐྱེས་སུ་འབུལ་དགོས།
ཚེ་ཁོས་བསྒྱུར།
放大
缩小
默认
