༄༅། །བདག་གི་མ་ཡུམ།

བསམ་རྒྱུ་བུ་དང་དྲན་རྒྱུ་བུ་ལས་མེད་ཅེས་པའི་ཚིག་དེ་ཐོས་པ་ཙམ་གྱིས་རྣ་བར་འབུ་གྲོག་མོ་ཞིག་འཛུལ་བ་བཞིན་ན་ཟུག་གིས་མནར་ནས། “ཨ་མ”ཡི་བཀའ་དྲིན་དེ་ཐ་སྙད་ཡིག་འབྲུ་གཉིས་ཁོ་ནས་མཚོན་ཐབས་བྲལ་བ་རྟོགས་བྱུང་།

འདས་པའི་ལོ་རྒྱུས་ཆུ་རྒྱུན་རིང་མོས་དྲན་པའི་མེ་ལོང་གཙང་བར་གསལ་མོད། ངའི་སེམས་སུ་ཁྱེད་ཀྱི་གཡོ་ཟོལ་དྲི་དང་བྲལ་བའི་འཛུམ་མདངས་ཡལ་མི་མྱོང་། ལྷག་པར་དུ་ཁྱེད་ཀྱིས་ཁྱིམ་ཚང་དེའི་ཆེད་དུ་སོ་ནམ་གནང་སྐབས་ཀྱི་གྲིབ་གཟུགས་དག་ཝ་ལེར་གསལ། འཇིག་རྟེན་ན་ཆེས་ཡིད་དུ་འོང་བའི་སྐད་ངག་ཅིག་ཡོད་པ་དེ་ནི་ཨ་མ་ལགས་ཀྱི་བྱམས་བརྩེའི་འབོད་སྐུལ་ཡིན་པ་མ་གཏོགས་གཞན་ག་ལ་ཡིན། བསིལ་གྲིབ་ཀྱི་ལྗོན་ཤིང་བརྒྱུད་ནས་ཉི་མ་ལྷ་སའི་འཚེར་འཚེར་འོད་མདངས་བདག་གི་མདུན་དུ་འཕྲོ་སྐབས། བདག་གི་མིག་མདུན་དུ་འཆར་བ་ནི་སོ་ནམ་ལས་ལ་བྲེལ་བའི་ས་སྐྱེས་རྡོ་སྐྱེས་ཀྱི་སྐྱེད་མ་ཞིག་ལགས། ཁོང་གི་ཆ་ནས་བཤད་ན། དབྱར་དགུན་གྱི་གནམ་ངོ་ནི་བྱིས་པ་ཞིག་གི་སེམས་ཁམས་ལྟར་ཤིན་ཏུ་ནས་གྱ་གྱུ་དང་ཡོ་ཡོ་ཆེ་བ་ཞིག་རེད། དབྱར་གཞུང་གི་ནམ་ཟླར་རླུང་ཡན་བར་མེད་ལྡང་ཞིང་དྲག་ཆར་ཆུ་བཤོས་པ་ལྟར་འབབ་སྐབས་སྐྱེད་མ་ཁོང་གི་ཀོ་བའི་སྟོད་གོས་དེ་བརླན་པར་གྱུར་ཡང་ད་དུང་ཞིང་ཆུ་འདྲེན་པར་བྲེལ། དགུན་དུས་སུ་ཐལ་བས་ཁེངས་པའི་སྐྱ་ཐིང་ཐིང་གི་ས་གཞི་ཆེན་པོར་ལྡང་བའི་གྲང་རླུང་སྤུ་གྲི་འདྲ་བ་དེས་སྐྱེད་མ་ཁོང་གི་གདོང་དང་ལུས་པོ་ཅི་ཙམ་གཙེས་ནའང་ཞིང་སར་འཁྱགས་ཆུ་གཏོང་བར་མགོ་འཁོར་ནས་མཆིས། སྐྱེད་མ་ཁོང་དུས་ནམ་ཞག་རྒྱུན་དུ་ཞོགས་ཇ་ཚ་པོ་ཞིག་མཆོད་རྒྱུ་མེད་པའི་ཁར་ཉིན་གང་པོ་བཞི་མདོ་ཁ་རུ་ཕར་འགྲོ་ཚུར་འགྲོ་བྱེད་པའི་ཁ་ལོ་བ་ཞིག་དང་འདྲ་བར་ཞིང་ལས་དང་ཁྱིམ་ལས་ལ་བྲེལ། དགོང་མོ་ཞལ་ལག་དྲོན་པོ་ཞིག་ཀྱང་མཆོད་རྒྱུ་མེད་པར་གཟིམས་དགོས་པས། དེ་ལྟར་ཉིན་ནས་ཟླ་དང་ཟླ་ནས་ལོ་བར་རྒྱུན་འཁྱོངས་བྱས་ནས་ཁྱིམ་ཚང་དེ་ཚ་སོབ་བེར་གཏོང་བ་མ་ཟད། གཞན་སར་རང་སྡོད་དང་རང་སར་གཞན་འཇོག་གིས་ཡུལ་མི་ཁྱིམ་མཚེས་ཚང་མར་ཁ་དགྲ་སྣ་དགྲ་ཡང་བསགས་མི་སྲིད། དེ་ནི་ངའི་དྲིན་ཆེན་མ་ཡུམ་རེད་ལགས།

ཁོང་ཡིག་རྨོངས་པ་ཞིག་ཡིན་ཡང་བུ་ཕྲུག་གི་སློབ་གསོ་ལ་ཧ་ཅང་གི་མཐོང་ཆེན་པོ་ཡོད་པས། ང་ཚོ་སྤུན་ཆུང་གསུམ་སློབ་གྲྭ་གྲོལ་ཏེ་ཁྱིམ་ལ་ལོག་སྐབས་ཁོང་གིས་ང་ཚོར་དཀའ་ངལ་ཆེ་བའི་འཁང་ར་མི་འདོན་པར་འཛུམ་མདངས་ལྡན་པའི་སྒོ་ནས་ང་ཚོ་བསུ་བར་བྱེད། ང་ཚོར་ཀུན་སྤྱོད་ཞི་དུལ་གྱི་སྐྱེ་བོ་ཞིག་བྱེད་དགོས་པ་ལས་ནོར་འཁྲུལ་གྱི་ལམ་དུ་མི་བསྐྱོད་པའི་སྐུལ་མ་དང་གཞན་ཕན་གྱི་བྱ་བ་སྒྲུབ་མི་ཐུབ་རུང་གཞན་གནོད་རང་རྒྱལ་གྱི་བསམ་བློ་ངན་པ་དེ་ཚོ་དོར་དགོས་པའི་སློབ་གསོ་གནང་། ངའི་བློ་ངོར་བརྗེད་པར་དཀའ་བ་ནི་ཁྱིམ་ལ་བརྙན་མཐོང་ཁ་པར་གཏོང་སྐབས་ཀྱི་དུས་དེ་རེད་ལ་ཆེས་ཡིད་སྐྱོ་བའང་དུས་དེ་རེད། ཡུམ་གྱི་གདོང་དམར་སྨུག་དེ་དང་ཁྲག་ལྟར་དམར་བའི་མཁུར་ཚོས་ལས་བྱམས་དང་བརྩེ་བ་ལྡན་པའི་འཛུམ་མདངས་ཀྱིས་ང་ལ་སློབ་གསོ་ནོར་བུའི་ཕྲེང་བ་བརྗོད་སྐབས་ང་རང་རང་དབང་མེད་པར་མཆི་མ་ཤོར། དེ་དུས་རང་ཉིད་ནི་ཉི་མའི་ཚ་གདུག་མགོ་ལ་མི་ཕོག ཆར་ལྷགས་གདོང་གིས་བསུ་མི་མྱོང་བའི་བུ་མོ་བསོད་ནམས་ཅན་དེ་ཡིན་པ་ཤེས་བྱུང་། དྲིན་ཨ་མ་དེ་ལྟ་བུ་ཞིག་མི་ཡུལ་འདིར་འཕྲད་པ་ཡང་ལས་དབང་ཡིན་པ་ཤེས་བྱུང་བས་ངས་གཅེས་སྤྲས་བྱེད་ཀྱི་ཡིན།

ད་ལྟའི་མི་རྣམས་ཀྱིས་སྒོར་མོ་མང་པོ་བཀོལ་ནས་ཐབས་བརྒྱ་ཇུས་སྟོང་གིས་མིང་གྲགས་ཅན་གྱི་རི་མོ་བསྡུ་གསོག་བྱེད། འོན་ཀྱང་ཁོ་ཚོས་འཛམ་གླིང་གི་ཆེས་མཛེས་པའི་རི་མོ་དེ་མི་སོ་སོའི་འགྲམ་དུ་ཡོད་པ་དྲན་མྱོང་ངམ། དེ་ནི་ཨ་ཁུ་ཉི་མ་ཅི་འདྲའི་དྲིན་ཆེ་ཡང་འུག་པ་ནི་ལོང་བར་འགྱུར་ནས་དེའི་བདེ་སྐྱིད་ཚོར་མི་ཐུབ་པ་ལྟར་ཡིན། ཁྱོད་ཀྱི་ཨ་མའི་ཕྱི་ཚུལ་སྤྱིར་བཏང་ཡིན་ཡང་ཁོང་གི་གཟི་བརྗིད་ཀྱིས་འཛམ་གླིང་གི་རི་མོ་གྲགས་ཅན་ཚང་མ་ཉམས་སུ་ལེན་ཐུབ། འགྲོ་བ་ཀུན་གྱིས་དགའ་དུས་དགའ་འབོད་དང་སྐྱོ་དུས་ངུ་འབོད་བྱེད་སའི་གནས་ཚང་དྲོན་མོ་དེ་ནི་དྲིན་ཆེན་ཨ་མ་ཡིན།

ཨ་མའི་འཛུམ་མདངས་ནི་འཛམ་གླིང་སྟེང་ཆེས་ཞི་འཇམ་གྱི་དཔྱིད་རླུང་ཡིན། ཨ་མའི་གཉེར་མ་ནི་དཀའ་སྡུག་གི་ལོ་ཟླའི་གངས་ཆར་གྱི་ཤུལ་ཡིན། ཨ་མའི་རྔུལ་ཆུ་དག་ནི་འཛམ་གླིང་ན་ཆེས་རྩ་ཆེན་གྱི་མུ་ཏིག་ཡིན། མ་ཡུམ་གྱི་འདྲ་པར་རྣམས་ནི་དཔའ་ངར་དང་བློ་བརྟན་འགྱུར་མེད་ཀྱི་མཚོན་རྟགས་ཡིན་ནོ། །

ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།

ཟུར་ཁྲིད་དགེ་རྒན། ཚེ་བརྟན་རྒྱལ་པོ།