༄༅། །བཤེས་གཉེན་ལགས།

བཤེས་གཉེན་ལགས། ཁྱེད་ནི་འགྲོ་བ་མིའི་ཤེས་རིག་གི་བློ་སྒོ་འབྱེད་པའི་ལྡེ་མིག་འཛིན་མཁན་དེ་ཡིན་ལ། ཁྱེད་ནི་མེས་རྒྱལ་གྱི་གསར་སྐྱེས་མྱུ་གུ་གསོ་སྐྱོང་གནང་མཁན་དེ་ཡང་ཡིན། ཁྱེད་ནི་མིའི་རིགས་ཀྱི་ཤེས་རིག་གི་མུན་པ་གསལ་བར་བྱེད་པའི་རྟ་བདུན་དབང་པོ་དེ་ཡང་ཡིན།

བཤེས་གཉེན་ལགས། ཁྱེད་ཀྱི་འགྱུར་མེད་ཀྱི་སྙིང་སྟོབས་དང་ལྷད་མེད་ཀྱི་བརྩོན་སེམས་ལ་བསྔགས་པར་འདོད་དེ། ཁྱེད་ཀྱི་ང་ཚོ་གསར་སྐྱེས་གཞོན་ནུ་རྣམས་ལ་ཤེས་རིག་གི་བློ་སྒོ་འབྱེད་པ་དང་། སྙིང་སྟོབས་ཀྱི་སྤོབས་པ་སྦྱིན། ཁྱེད་ཀྱི་འགྱུར་མེད་ཀྱི་བརྩོན་སེམས་ནི་ནམ་མཁའི་ནོར་བུ་བཞིན་དུ་འོད་ཟེར་འབུམ་གྱིས་ཕྱུག་པ་དང་། ཁྱེད་ཀྱི་ལྷད་མེད་ཀྱི་སྙིང་སྟོབས་ནི་རི་བོ་ཇི་བཞིན་བརྟན་ཅིང་བརྗིད།

བཤེས་གཉེན་ལགས། གལ་ཏེ་ཁྱེད་མེད་ན་མིའི་རིགས་ཀྱི་སྤྱི་ཚོགས་ལ་འོད་སྟོང་འབར་བའི་གཟི་བརྗིད་ལྡན་མི་སྲིད་ལ། གལ་ཏེ་ཁྱེད་མེད་ན་ང་ཚོ་གསར་སྐྱེས་ཀྱི་གཞོན་ནུ་རྣམས་ལ་ཤེས་རིག་གི་བདུད་རྩི་གསར་པ་སུ་ཡིས་སྦྱིན། གལ་ཏེ་ཁྱེད་མེད་ན་ང་ཚོའི་མེས་རྒྱལ་འདི་ཡང་ཤེས་རིག་དང་འབྱོར་ཕྱུག་ལྡན་པའི་རྒྱལ་ཁབ་སྟོབས་ལྡན་ཞིག་ག་ལ་ཆགས་སྲིད། བཤེས་གཉེན་ལགས་ཁྱེད་ཀྱིས་འགྲོ་བ་མི་ལ་བཞག་པའི་མཛད་རྗེས་ནི་མུ་མེད་ཀྱི་རྒྱ་མཚོ་ཇི་བཞིན་གཏིང་མཐའ་བྲལ་ཞིང་ཁྱོད་ནི་འཇིག་རྟེན་འདིའི་མུན་པའི་སྨག་རུམ་སེལ་བའི་ཤེས་རིག་གི་ཕོ་ཉ་ཞིག་རེད་ཨང་།

བཤེས་གཉེན་ལགས། ཁྱེད་ནི་ང་ཚོའི་སེམས་ནང་རྟག་ཏུ་འཚེར་བའི་མཐོ་སྒང་གི་སྐར་མ་འོད་ཆེན་དེ་ཡིན། ཁྱེད་ཀྱིས་ང་ཚོའི་ཕུགས་བསམ་གྱི་ས་བོན་ལ་ཚོན་མདོག་བཀྲ་བའི་སྤྲོ་སྣང་སྦྱིན། བཤེས་གཉེན་ལགས། ཁྱེད་ཀྱིས་འཆད་རྩོད་རྩོམ་གསུམ་གྱིས་ང་ཚོར་སྨག་རུམ་གྱི་ཀློང་ནས་ཤེས་རིག་གི་མདུན་ལམ་བསྟན་པ་དང་། ཁྱེད་ཀྱི་རྣམ་དཔྱོད་ཀྱིས་ང་ཚོར་འཇིག་རྟེན་གྱི་ལེགས་ཉེས་ལ་བླང་དོར་འབྱེད་པའི་ལམ་སྟོན་མཛད།

བཤེས་གཉེན་ལགས། ཁྱོད་ནི་འཛམ་གླིང་གི་ཡང་རྩེ་ན་རང་ཉིད་ཀྱི་ཚེ་སྲོག་ཕྲ་མོ་དེ་ལ་འཇིགས་པ་མེད་པར་མིའི་རིགས་ཀྱི་ལས་དོན་དང་འཚོ་གནས་ཀྱི་ཆེད་དུ་བརྩོན་པ་དང་རང་དོན་དོར་ནས་གཞན་དོན་སྒྲུབ་པའི་བྱ་སྤྱོད་དེ་ནི་ཅི་འདྲའི་རླབས་ཆེ་བ་ཞིག་རེད་ཨང་།

བཤེས་གཉེན་ལགས། ཁྱེད་ཀྱི་རང་ལུས་ཟུངས་ཁྲག་གིས་གསར་སྐྱེས་གཞོན་རབས་རྣམས་གསོ་སྐྱོང་བྱས་པ་དེ་མཐོང་དུས་ངས་སྙིང་དབུས་ནས་ཁྱེད་ལ་བསྟོད་གླུ་སྙན་མོ་ཞིག་ལེན་འདོད་ལ། ཁྱེད་ཀྱི་སྒེར་སེམས་དང་སྤོབས་པ་ཅི་ཡང་མེད་པར་བུམ་པ་གང་བྱོའི་ཤེས་རིག་གནང་བ་དེ་ཡིད་ལ་དྲན་དུས་ངས་སེམས་གཏིང་ནས་ཁྱེད་ལ་དཀར་གཙང་གི་མཇལ་དར་ཞིག་འབུལ་འདོད།

བཤེས་གཉེན་ལགས། ཁྱེད་ཀྱིས་ང་ཚོར་གསུངས་པའི་ལེགས་བཤད་དག་ནི་ང་ཚོ་རྨོངས་གཉིད་ལས་སད་བྱེད་ཀྱི་ཅོང་བརྡ་སྙན་མོ་དེ་ཡིན། ཀྱེ་བཤེས་གཉེན་དམ་པ་ལགས། ཁྱེད་ཀྱི་སློབ་བུ་ང་ལ་ངོ་མཚར་གྱིས་སྤྲིངས་པའི་རྩོམ་འབྲིའི་ནུས་པ་ལྡན་ཚེ་ངས་ཁྱེད་ལ་བསྟོད་ཚིག་གྲངས་ཀྱིས་མི་ལང་བ་ཞུས་ཆོག །

ལྷ་ས་མཐོ་འབྲིང་གཉིས་པའི་ལོ་རིམ༢（༥）

ཟུར་ཁྲིད་དགེ་རྒན། བསོད་ནམས་དོན་གྲུབ།