༄༅། །སྨོན་འདུན།

བློ་གསལ་ཤེས་འདོད་རྐང་དྲུག་གིས།།

རིག་པའི་གེ་སར་བསམ་ནས་ནི།།

ས་ཐག་ལེ་དབར་ཆོད་པའི་སར།།

རིག་པའི་དཔའ་བོ་མཇལ་བར་འོངས།།

མཐོ་ལ་བརྗིད་པའི་ཇོ་རི་ནི།།

སྤྲིན་གྱི་རྒྱ་མཚོར་ཟུག་འདྲ་བ།།

དྲིན་ཆེན་བཤེས་གཉེན་དམ་པ་ཁྱེད།།

མཁྱེན་རྒྱ་དཔའ་ལ་རིག་པ་རྣོ།།

ཤང་ཤང་རྒྱུགས་པའི་སྐྱིད་ཆུ་ནི།།

སྲིད་པར་ཆགས་ཀྱང་ཆད་མི་སྲིད།།

བདག་གི་དམ་པའི་བཤེས་གཉེན་གྱི། །

ཐུགས་རྒྱུད་སྐྱིད་ཆུས་འགྲན་མི་ནུས།།

ཀེ་ལ་ཤ་ཡི་ལྷུན་པོའི་སྤོ། །

དཀར་ཞིང་གཙང་བས་ལྷག་པར་མཛེས།།

བརྩེ་བའི་བདག་ཉིད་སྐྱོ་ངལ་མེད། །

ཐུགས་སེམས་དྭངས་གཙང་ལྷད་མེད་ཡིན།།

སྟོན་ཁ་ལོ་ལེགས་རྒྱས་པའི་དུས།།

གཞོན་སྐྱེས་ཤེས་རིག་སྣ་མང་ཕྱུག །

ཤེས་རིག་དར་བའི་བཀའ་དྲིན་ནི།།

ཀུན་ནོར་བཤེས་གཉེན་ཁྱེད་ལས་སུ།།

མུན་ནག་འཚོ་བར་ལམ་སྟོན་མཁན།།

མུན་སེལ་སྒྲོན་མེ་དྲིན་ཆེ་བྱུང་། །

ལྷག་བསམ་སེམས་དང་བརྩེ་བ་ཡིས། །

བློ་ཡི་རྨོངས་པ་སེལ་བར་བྱེད།།

འགྱུར་བ་མེད་པའི་ཕ་བོང་ནི།།

དུས་ཀྱིས་མནར་ཡང་འགུལ་མི་སྲིད།།

བདག་གི་བརྩེ་བའི་བཤེས་གཉེན་ཁྱེད།།

སྐུ་བརྩེ་བྲག་ལས་བརྟན་པར་ཤོག །

ལྷ་ས་ཅང་སུའུ་ཚོད་ལྟའི་སློབ་འབྲིང་ལང་ཚོའི་མེ་ཏོག་རྩོམ་རིག་ཚོགས་པ།

ཟུར་ཁྲིད་དགེ་རྒན། བོན་བསྟན་འཛིན།