༄༅། །བདེ་ཐང་ནི་རིན་ཆེན་གསེར་ལས་ལྷག །

བདེ་ཐང་གི་གཟུགས་པོ་ནི་རླབས་ཆེན་གྱི་བྱ་གཞག་སྒྲུབ་པའི་མ་རྩ་ཡིན་པར་བརྟེན་ང་ཚོས་དུས་རྒྱུན་དུ་ནས་གཟུགས་པོར་བདག་གཅེས་དང་སྦྱོང་བརྡར་བྱེད་དགོས་པ་ལས། གཟུགས་པོ་ནི་མི་རྟག་པ་རེད་ཅེས་ཐ་མག་ཚོད་མེད་འཐེན་པ་དང་། ཆང་རག་ར་བཟི་བཟི་བར་འཐུང་བ། ལེ་ལོའི་དབང་གིས་གཟུགས་པོར་ལུས་སྦྱོང་མི་བྱེད་པ། རྒྱུན་གཏན་གྱི་འཚོ་བའི་གོམས་གཤིས་ལ་དོ་སྣང་མེད་པ་སོགས་ཀྱིས་རང་ཉིད་ལོ་ན་ཆུང་ཆུང་ཡིན་ཡང་རྒས་འཁོགས་ཀྱི་གཟུགས་ལྟར་འགྱུར་བར་ངེས།

མི་མང་པོས་རང་ཉིད་ཀྱི་གཟུགས་པོར་སྣང་ཆུང་ཤོར་ཏེ་ཉིན་མཚན་བསྟུད་མར་ལས་ཀ་དང་སློབ་སྦྱོང་བྱས་ཏེ་མཐའ་མར་རང་ཉིད་ཤེས་ཡོན་ཅན་དང་གོ་གནས་ཡོད་པ། འབྱོར་པ་ཅན་སོགས་ལ་འགྱུར་སྲིད་ཀྱང་རང་ཉིད་ཀྱི་གཟུགས་པོ་ནད་གཞིས་མནར་བའི་སྐབས་སུ་སྔོན་བྱས་བྱ་བ་བྱེད་སྟངས་རྣམས་ལྐུགས་པའི་ཚུལ་དུ་མཐོང་སྟེ་འགྱོད་པ་བྱེད་མཁན་མང་པོ་ཡོད། བྱས་ཙང་ལུས་སེམས་བདེ་ཐང་ལ་གཅེས་འཛིན་མི་བྱེད་མཁན་དག་ལ་གླེན་པ་ཟེར་རྒྱུ་མ་གཏོགས་གཞན་གང་ཡང་མེད། ང་ཚོའི་བོད་ཡིག་རྒན་ལགས་ཀྱིས་གསུངས་པ་ལྟར་ང་ཚོ་བོད་མི་ཕལ་ཆེ་བས་སྐྱིད་པོ་བྱས་པའི་ཆུ་ཚད་མཐོ་ཤོས་ནི་ར་བཟི་བཟི་བར་ཆང་རག་བཏུངས་པ་དེར་ངོས་འཛིན་བྱེད་ཀྱི་ཡོད། མི་མང་པོས་ཆང་རག་ཚོད་མེད་བཏུངས་པའི་རྐྱེན་གྱིས་འགྲིམ་འགྲུལ་གྱི་དོན་རྐྱེན་དང་། ཁྱིམ་ཚང་གི་གནས་ཚུལ། ལུས་ཀྱི་ན་ཚ་སོགས་མང་པོ་ཐོན་བཞིན་ཡོད། གཟུགས་པོ་ཕན་མེད་ཆགས་དུས་གཞི་ནས་བདེ་ཐང་གི་གལ་ཆེའི་རང་བཞིན་རྟོགས་པ་ལས་ཆུ་མ་ཤོར་གོང་ལ་ཆུ་རགས་རྒྱག་མཁན་ཤིན་ཏུ་ཉུང་། ལྷག་པར་དུ་གཞོན་ནུ་མང་པོས་ལང་ཚོའི་དུས་སྐབས་ཐུང་ཐུང་ཡིན་པས་སྐྱིད་པོ་བྱེད་དགོས་ཞེས་ཉིན་མཚན་གྱི་དབྱེ་བ་མེད་པར་ཁ་པར་ལྟ་བ་དང་། དྲ་ཁང་དུ་ཉིན་འགའ་ཤས་བསྟུད་མར་སྡོད་ཅིང་མ་འོངས་པའི་འཆར་གཞི་ཚང་མ་སྟོང་བསམ་གྱི་ནང་དུ་ལུས། ཡང་མི་ཁ་ཤས་ཀྱིས་སྤྱི་ཚོགས་འཕེལ་རྒྱས་ཆེ་བས་ནད་བཅོས་ཐུབ་ཀྱི་རེད་ཟེར། ཁ་ཤས་ཀྱིས་དངུལ་ཡོད་ན་ནད་ཀྱི་སྡུག་བསྔལ་ལས་ཐར་ཐུབ་ཟེར། འོ་ན་མི་ཕྱུག་བདག་མང་པོ་ནད་ཁང་དུ་འཆི་བའི་རྒྱུ་རྐྱེན་གང་ཡིན།

མི་སུ་འདྲ་ཞིག་རླབས་ཆེ་བའི་བྱ་གཞག་ཅིག་སྒྲུབ་འདོད་ན་ཐོག་མར་རང་ཉིད་ཀྱི་གཟུགས་པོའི་བདེ་ཐང་གཙོ་བོར་བཟུང་སྟེ། དེ་རྗེས་དཀའ་སྡུག་མང་པོ་ལས་རྣམ་པར་རྒྱལ་བའི་ལས་ཀར་འཇུག་དགོས། དེར་བརྟེན་ང་ཚོས་དུས་རྒྱུན་ནས་ལུས་སྦྱོང་རྒྱུན་འཁྱོངས་བྱེད་པ་དང་། གཙང་སྦྲ་འཕྲོད་བསྟེན་ལ་དོ་སྣང་བྱེད་པ། ཟས་སྤྱོད་ལུགས་དང་མཐུན་པ་སོགས་ཀྱི་འཚོ་བའི་གོམས་གཤིས་བཟང་པ་ཆགས་པོ་དགོས། །

ལྷ་ས་ཅང་སུའུ་ཚོད་ལྟའི་སློབ་འབྲིང་ལོ་རིམ༡（༡༡）

ཟུར་ཁྲིད་དགེ་རྒན། ཚེ་བརྟན་རྒྱལ་པོ།